ويلي من الغربة يابا ويلي
ويلي ويلي ويلي ويلي ويلي
بعد سنين في الغربة شفوني
قالولي جايب ايه من بره
قولت ياريتهم لو سألوني
أنا في الغربة بكيت كام مرة
جبت حاجات من اللي يحبوها
جبت فلوس وياريت يخدوها
ويردولي شباب ضاع مني
وسنين مت وهما عاشوها
على إيه بس يا ناس حاسدني
وأشقى مافيكم أسعد مني
أنتم عشتم أحلى سنينكم
وأنا في الغربة معشتش سني
انا اللي كبرت قبل أواني
وبختي للغربة رماني
خدو مني كل اللي جمعتو
وأرجع أنا صغير من تانى
أنا راح عمري ألم ودموع
أنا قضيتها سفر ورجوع
وإن فكرت أضحك من قلبي
قلب الغربه يقول ممنوع
أتحملت يا ناس فوق طاقتي
واتغربت في عز برائتي
كتبو لكل الناس عنوانها
وانا كتبولي غريب في بطاقتي
ثمن الغربه دفعته بدمي
بسنين فيها بعيد عن أمى
مين في الغربه يا ناس مبسوط
مين على راحتو مش مضغوط
مين أتحدى يقول مش خايف
أنه بعيد عن بلده يموت
يلي بتسعى عشان تتغرب
خدها نصيحة وأوعى تجرب
كلها بدقه يا صاحبي في بلدك
وأوعى من مشاوير الغربه تقرب .. 🌸🌸
Aucun commentaire:
Enregistrer un commentaire