ليل المصباح ....
الليل يا الليل يا المسهرني وحداني
من نجومك نغزل حكايات و معاني
القمر من ضيو وزين بهاه سباني
النوم يا الليل طار من جفاني
كيفاش يرجع يشوفني ثاني
شوف يا ليل التيهان فين رماني
بحورك امواج من الظلام عماني
الليل يا الليل معاك أنا يحسن اعواني
الليل يا الليل شحال انت طويل
مع ضو الشمعة والفتيل
مع زيت القنديل
والقنديل آه داك سيدنا القنديل
مادار فينا خير ما دار فينا جميل
فين الإصلاح
علاه كاع ما ضوك ف سمانا لاح
عايشين ف بلادنا سواح
قهرتي الخوت الناس الملاح
انت فانوس ايه انت مصباح
ليلنا معاك شكا و بكا ونواح
ما ارحمتي تاجر ولا فلاح
كلشي ف الهم تلاح
لشجار من ظلمك خايفة
الجبال من بطشك راجفة
الناس ليك اليوم عايفة
لبصار لعيوبك شايفة
اعوامك سبحان الله ناشفة
نرجع ثاني أنا ليك يا الليل
من هم المصباح رجعتي ليا خليل
نشكي ليك همي والصدر عليل
نبكي على حالي واللسان ثقيل
ميل يا الزمان لعوج ميل
صافي مابقا ما يعجب
بنادم على حالو تغلب
ما كاين غير اجبد ف البزولة احلب
وانت يا المسكين ما عندك حق تطلب
تسنى القدر شنو ليك وليا يكتب
هشام بريطل
Aucun commentaire:
Enregistrer un commentaire