بقلمى/حنان العجمى#
قصيدتى بالعامية المصرية
بعنوان/"رسالة تحية وسلام للعامل الهُمام"
وفى عِز حالتنا وكورونا
وأَخَدونَا وجَابُونَا
وعلاجنا ادُّونَا
وبيوتنا قَعَّدُونا
ورمضان وشم نسيم هَنُّونَا
وغدر وشهيد وخانونا
وزَحمَة امتحانات عِيَالنَا
وأزمِة نِت ودوخنَا يا لَمُونه
رَفعنا إيدينا سلامنَا لأخونَا
دَايِر تِرس ف ساعة مجنونه
لايِكِل ولا يِمِل وعَرَقُه طاحونه
وهناك سقَّالَه فوقها عِماله
وجُوَّه المصنع فِكرُه بيِبدِع
يُسجُد يِحمِد سُبحانُه ما أَبدَع
يزرَع يُحصُد أَلَمُه مَا يِوجَع
م الفَجرِيَّه لِلعَصرِيَّه مَغرِب يِرجَع
شارِع كَانِس ف عِز الحَر لُقمه ما يبلَع
طالِع نَازِل طَلَبَك يِوْصَل
وعَشَان بَهِيَّة وعيونها وحِنِّيَّة
وحاجة حلوَة لِيهَا ولِولادهَا هِديَّة
وأعياد جَايَّة ولازِم لِبس وعيدِيَّة
تَعَبُه يِنسِج أحلى أُغنِيَّة
سامِع يا محمود وأمل وبدريّة
أنا قايِم صُبحِيَّة والخَبزَة قَمحِيَّة
إعجِنى العِيش يا صَفِيَّة
يا دُوب أَلْحق طَلبَات دُكتُورنَا عَطِيَّة
والمُهَندِسَة نَجِيَّة قبل الضُهرِيَّة
أنا فرحان ودِى أَعظَم تَضحِيَّة
عارفَة يا أُمْ آمال رَفعُوا إيدِيهُم لِيَّ
تعظيم سلام وتَحِيَّة
مِسِيرِى أَرُدِّلْهُم أحلَى واجِب وهِديَّة
يوم مَا أعزِمهُم بِفَرَح بِنتِك تَحِيَّة
عارفة يا بَهِيَّة هَدبَح أُضحِيَّة
وساعِتهَا الدُنيا تَمام
وكورونا مِسِيرهَا تنام
ونسمَع إقامة وأَدَان
وعلى الجَّامِع أَرُوح حَضَّرى مصَلِّيَّة
و نَدرٍ عَلَيَّ لَجِبلِك شال وفُل
وصُحبَة وَردِيَّة
وَيَا سِتِّى كَمَان مَزهَرِيَّة
ومِين عَالِم لَوْ أقبَض بَدرِى الجمعية
أَجِيب لِمحمود بدلة وقفطان لِيَّ وطاقِيَّة
وأطَلَّعِك العُمرة وعنينا تشُوف الكعبة
ودِى أَعظَم عَطِيَّة
بَس إنتِ إدعى يا بَهِيَّة
رَبِّك عَالِم بِيكِ وبِيَّ
خَلاص يا بَهِيَّة هأنام وأصحَى الفَجرِيَّة
واللهِ راضِى وإنتِ والعِيَال نعمة
وبُكرا تروح الغُمَّة
يا سِتِّى سيبينى أحلَم أنا شايِف رُؤيا جَلِيَّة
خير اللهم اجعَلُه خير
مَلَكت أرض زراعية
وجَوِّزت محمود وجِبت العَرَبِيَّة
تِصبَحى على خير يا بَهِيَّة
بَلدِى غَاليَة عَلَيَّه
وهَصحَى الصُبحِيَّة
أَشُوف شُغلِى وَرايَا مسؤولية
مَاهُو كُلُّه عَشانِك وولادنا وأحفادنا
وبلَدنا الحلوَة دِيَّه
يا مصر يا جَنَّة يا حُورِيَّة
حنان العجمى#
Aucun commentaire:
Enregistrer un commentaire